ស្ពានអូរតាគី - លោក ស៊ីន ស៊ីសាមុត | Spean Au Taky - Sin Sisamuth

Audio Description

"ប្រវត្តិចម្រៀង" បទ "ស្ពានអូរតាគី" គឺជាស្នាដៃនិពន្ធទំនុកច្រៀង និងបទភ្លេង របស់ កវីម្ចាស់ស្ទឹងសង្កែ លោក គង្គ ប៊ុនឈឿន ដោយមាន លោក ហាស់ សាឡន គឺជាម្ចាស់ស្នាដៃសម្រួលតន្ត្រី ហើយ លោក ស៊ីន ស៊ីសាមុត គឺជាម្ចាស់សំនៀង។ បទនេះថតនៅកំឡុងដើមឆ្នាំ ១៩៧៤ ដោយប្រគំជាចង្វាក់សារ៉ាវ៉ាន់ ដាក់នៅក្នុងស៊េរីកាសែត "កម្លោះហុងដា កញ្ញាប៉េសេ" និងបានលក់ឲ្យ ក្រុមហ៊ុនចម្រៀង ឡាក់ សែ ។ បទនេះបានលាក់ទុកនូវប្រវត្តិស្នេហាពិតរបស់ លោក គង្គ ប៊ុនឈឿន ផ្ទាល់តែម្ដង ដែលរៀបរាប់អំពីប្រវត្តិស្នេហាដំបូងរបស់លោកដែលត្រូវបានព្រាត់ប្រាសគ្នា។ នៅក្នុងសៀវភៅដែលមានចំណងជើងថា "កំណាព្យស្នេហ៍មាស" ដែលតាក់តែងដោយ លោក គង្គ ប៊ុនឈឿន ផ្ទាល់ លោកបានសរសេរលម្អិតអំពីប្រវត្តិរបស់លោកផ្ទាល់ និងប្រវត្តិនៃបទចម្រៀងនីមួយៗដែលលោកតែង បានបញ្ជាក់ថា ការពិតលោកមានដើមកំណើតនៅខាង ភូមិបឹងព្រីង ឃុំថ្មគោល ខេត្តបាត់ដំបង ឯណោះទេ ប៉ុន្តែ ឪពុកម្ដាយរបស់លោក បានផ្លាស់ទៅរស់នៅឯខាង ឃុំចម្ការសំរោង វិញ។ ទោះបីជាលោកបានផ្លាស់មករស់នៅឯ ឃុំចម្ការសំរោង ប៉ុន្តែលោកនៅតែនឹកឃើញអនុស្សាវរីយ៍នៅឯ ភូមិបឹងព្រីង ជាពិសេសនឹកឃើញដល់អនុស្សាវរី៍យ៍ស្នេហាដំបូងរបស់លោក ដែលលោកបានស្រលាញ់នារីម្នាក់នៅទីនោះ។ សូមបញ្ជាក់ថា ទីតាំងដែលលោកបានរៀបរាប់នៅក្នុងបទនេះ គឺសុទ្ធសឹងតែជាទីតាំងដែលលោកបានណាត់ជួបគ្នាមួយនារីម្នាក់នោះ ដែលមាន ដូចជា ស្ពានអូរតាគី ស្ពានអូរតាកែ និងស្រែបារាំង ជាដើម។ បន្ទាប់មកនៅឆ្នាំ ១៩៧៤ ក្រុមហ៊ុន ឡាក់ សែ បានឲ្យ លោក គង្គ ប៊ុនឈឿន ផលិតចម្រៀងសម្រាប់ដាក់មួយកាស៊ែត ពេលនោះហើយដែលលោកបានចាប់ផ្ដើមសរសេរ បទ "ស្ពានអូរតាគី" នេះឡើង។ បទ"ស្ពានអូរតាគី" គឺប្រវត្តិស្នេហាគ្រាដំបូងរបស់លាក ដែលពោរពេញដោយមនោសញ្ចេតនាយ៉ាងជ្រាលជ្រៅ ប៉ុន្តែ លោក គង្គ ប៊ុនឈឿន ជាកូនអ្នកក្រ ហើយសង្គមខ្មែរកាលពីសម័យនោះ ជាសង្គមដែលមានប្រពៃណីតឹងតែង និងប្រកាន់វណ្ណៈទៀតផង។ ដូច្នេះហើយ ដោយសារតែលោកជាកូនអ្នកក្រ ម្ដាយខាងស្រីមិនយល់ស្របចំពោះស្នេហានោះឡើយ ព្រោះម្ដាយរបស់នារីម្នាក់នោះមិនចង់ឲ្យកូនស្រីផ្ញើវាសនានឹងកម្មកររថភ្លើងនោះទេ។ ពេលនោះដោយសារតែម្ដាយរបស់នារីម្នាក់នោះ ឃើញកូនស្រីចេះតែលួចជួបគ្នាជាមួយ លោក គង្គ ប៊ុនឈឿន ទើបម្ដាយរបស់នារីនោះ បាននាំនារីម្នាក់នោះទៅមង្គលបុរី ដែលមានរៀបរាប់ផងដែរនៅទំនុកច្រៀងរបស់លោក។ នៅពេលដែលនារីម្នាក់នោះបានទៅដល់មង្គលបុរី លោក បានផ្ញើសំបុត្រតាមអ្នករត់ពន្ធតាមខ្សែរថភ្លើងទៅនារីម្នាក់នោះផងដែរ ប៉ុន្តែបានត្រឹមតែម្ដាយរបស់នារីម្នាក់នោះជេរប្រទេចតែប៉ុណ្ណោះ។ លោក គង្គ ប៊ុនឈឿន បាននិយាយថា ថ្វីត្បិតតែជីវិតកម្មកររថភ្លើងក្រីក្រកំសត់ក៏ពិតមែន តែមានចិត្តស្មោះត្រង់ប្រៀបបីដូចជាផ្លូវដែកអ៊ីចឹង ប៉ុន្តែចិត្តស្មោះរបស់លោក មិនបានបណ្ដាលឲ្យស្នេហារបស់លោកបានសម្រេចឡើយ។ មួយវិញទៀត លោក គង្គ ប៊ុនឈឿន ថែមទាំងតូចចិត្តនឹងអ្នករត់ពន្ធដែលលោកបានផ្ញើសំបុត្រ ទៀតផង ព្រោះលោកគិតថា ប្រហែលជាអ្នករត់ពន្ធនោះចាក់ចុកបន្ថែម ទើបម្ដាយនារីម្នាក់នោះខឹងខ្លាំងយ៉ាងនេះ។ គួរបញ្ជាក់ថា ប្រវត្តិស្នេហាមួយនេះរបស់ លោក គង្គ ប៊ុនឈឿន បានត្រឹមតែបន្សល់ទុកនូវការខកចិត្តប៉ុណ្ណោះ ព្រោះអ្នកពីរមិនអាចបន្តរួមស្នេហានឹងគ្នានោះទេ។ បន្ថែមពីលើនេះ យើងខ្ញុំសូមធ្វើការវិវាគ ទំនុកច្រៀងមួយឃ្លាដែល លោក គង្គ ប៊ុនឈឿន បានសរសេរថា "សម្រក់ទឹកខ្មៅលើដំបៅចាស់" លោកសរសេរបែបនេះព្រោះតែលោកចង់បង្ហាញថា លោកកំពុងតែតែងនិពន្ធដោយរំលឹកនូវរឿងរ៉ាវឈឺចាប់របស់លោកជាថ្មីម្ដងទៀតហើយ។ ហេតុនេះ មានន័យថា លោកមិនចេះតែសរសេរឲ្យតែជួនគ្នានោះទេ។ ------ ស្រាវជ្រាវដោយ ៖ លោក សេង តារា https://youtu.be/5bTU08ZzwDw